حكاية فرحي

———-////——-/////——//////———/////———/////———////

النهاردة مامي ناهد حتقدم لنا عريس وعروسة جمال ربنا يسعدهم مع حكاية فرحي اليوم مع اماني وحسين

كان من احلى ايام عمرى اليوم الى اخيرا هيجمعنى بحب عمرى يوم بستناة و بعد ايامو يوم بعد يوم كل حاجة زى مخططلها وحلمت بيها فستانى و مكياجى قاعتى كل حاجة كانت فى خيالى لقيتها والاحلى حبيب عمرى بقى معايا لبقيت العمر مكنتش مصدقةنفسى من الفرحة و السعادة الى كنت فيها بس فى نفس الوقت مكنتش مصدقة انى كمان خلاص دة اخر يوم ليا فى بيت اهلى و انى منالنهاردة هيكون ليا بيت تانى بتاعى ملكى انا طبعا فى وسط الفرح و الزغريط كان فى دموع الشوق والحنين من امى و اخواتى البنات ومنى انا كمان على قد فرحتنا على قد صعبان علينا انى خلاص ماشية بس الى خرجنا من دة كلو بهجة الفرح واد اية كان جميل وكلو فرحة و سعادة من كل الناس للعروض الى كانت جميلة جدا من الرقص الاسكندرانى والشامى و الاسكتلاندى كمان ومن صحابى وقريبى الى مسبونيش ولا بطلو رقص لحد اخر دقيقة فى الفرح بجد اليوم دة هو احلى يوم فى عمرى و نصحتى لكل بنت اختارى صح عشان تفرحى بجد وتكمل معاكى العمر كلو

——-/////———/////——-/////——-/////———////——-//////////

النهارده سوف تروى لنا مامي ناهد أجمل قصه لاحلى عروسين ايمان وعلي

ايمان بتحكي لنا يوم فرحى
أجمل ايام حياتي ع الاطلاق اليوم الي انتظرناه سنين بشوق ولهفة اليوم الي هيجمعنا ف بيت واحد اليوم الي تعبنا علشان نوصله وعلشان نكون مع بعض طول عمرنا ومفيش حاجة تبعدنا عن بعض بعده فرحته لا توصف ولا تحكي والفرحة الي ملت قلوبنا اكتر بكتير من الي الناس شافتها ع وشوشنا يوم مليان بهجة وسعادة وفرحة من القلب وشوق ولهفة لحبيب عمرى الي أخيرا بقي جوزى بعد صبر طويل أجمل وأرق وأحن إنسان ع وجه الارض المعني الحقيقي للسند والأمان الي جمبه موش بحتاج لاي حاجة ولا اي حد ف الدنيا هو كفاية عليا والي طلعت بيه من الدنيا
كان يوم مبهج بزيادة من بدايتة والفستان والميكب والترقب لشكلي ف يوم مستنياه من سنين وكانت معايا احلي ميكب ارتيست ف الدنيا وخلتني أميرة ف يوم تتويج حبنا
ولحظة إنتظار حبيبي يجي يأخدني من إيديا لبيته ولحضنة ودقة القلب وقتها متتوصفش
والسيشن وحلاوتة والضحك الي طالع من القلب وأحسن فوتوجرافر الي طلعت عنيه والي طلع شغل عالي الحمد لله
والفرح بقي ولمة الاهل والاصحاب والعيلة إحساس أعظم من إنه يتوصف بكلام
الصبر حلو وربنا بيعوض والحمد لله اليوم كان أجمل ايام حياتي وهيفضل هو اجمل يوم ف حياتي للابد يكفي انه اليوم الي فيه بدأنا حياتنا سوا وربنا يجعل ايامنا كلها فرحه وحب وسعادة
______________________________________

النهاردة مامي ناهد حتشارك عروسه
جديدة قصة فرحها حنشارك دينا وصادق قصتهم الجميلة 

النهارده انا هحكي حكاية كل البنات بتحلم بيها يوم الفرح قد أي كلنا بنتمني كدا و ناس كتير بتقلقنا و بتخوفنا من الجواز و لكن الصراحه الجواز ممتع و خصوصاً المشاركه و الموده والحب الي ربنا بيزرعه في قلوبنا اتجاه شريكنا..
عدت سنين خطوبتنا و بقينا مع بعض كنا مستنين اليوم دا بفارغ الصبر ..كل حاجة كانت صعبة و سهلة و مستحيلة و ممكنه بس الصبر كان المفتاح.
من تجهيز الشقه الفستان و اللف على البدلة واحنا سوا..
اليوم الي قبل الفرح كان يوم غريب في فرحة و حزن مشاعر متناقضة بس حلوة، البنوته كبرت و هتبقي عروسه و هيبقى لها حياة خاصه و بيت و أسرة متكونة وبودع سريري الصغير في أوضة بنت و اوضه ارتسمت فيها الصغيرة التي كبرت فيها وأسرة وزوج ومشاعر بتتقسم الساعة ٦ الصبح قمت خلصت شغلي و لما كان مهم لان شغلي هو انا و متحمسه لليوم العظيم يوم فرحي،
حضرت شنطتي وفستاني وعيني كلها دموع وبكاء وبمسحها وبداريها قدام امي بس مقدرتش في لحظه وانا بحضنها وبقولها مش مصدقة ان مش هتصحيني زي كل يوم من هنا، وهروح بيتي و كان حضن دافئ و كله أمان وركبت العربيه وانا ببكي و مشاعري مختلطه مش عارفه فرحانه ولا زعلانه ..
ووصلت الكوافير واليوم ابتدى و عملت اول ماسك ودي اهم حاجة المسكات اكتر حاجة اهتميت بيها قبل فرحي ويوم الفرح زي الزبادي بالعسل_ماسك الخيار_رده بالعسل وترمس ودي مسكات مهمه للحفاظ ونضارة البشرة و اختارنا تسريحة الشعر و طبعا الاكل في اليوم دا مهم علشان المجهود الي بيتبذل وهيتبذل في الفرح والرقص والتنطيط وجت الميك آب ارتيست واختياري في الالوان كان الNUDEلأنها بتظهرك طبيعية

و بسيطه ودي اهم حاجة تختاريها واتفرجي كتير على ميك أب عرائس خليكي بسيطه و طبيعية واثقه فيكي و في جمالك و الميك أب ارتست الشاطره هي الي هتعمل دا من نفسها هتحاول تطلع لك طبيعية بقدر الإمكان.
واكتر حاجة اخذت تدوير مش قادرة اقولكم طبعا اكيد الفستان بس الحمدالله بعد تدوير ولف لاقيت الفستان الي كان نفسي فيه وطلعت احلى عروسة و جزمة الفرح الدور الثاني والحمد لله مخدتش وقت كتير فيها واشتريت جزمه ساده بيضه و طرزتها يدوي لان بصراحه الجزم كان مبالغ فيها و المعازيم اتجننوا عليها و كنت قصده اعمل حاجة لفرحي بأيدي غير ديكور شقتي..
و لبست وعملت تسريحة بسيطه جدا و حطيت HEAD PIECE فضلت ادور لحد مالاقيت حجات تحفه ومش غاليه في ممر في وسط البلد وبقيت احلى عروسة خليكي عروسه اقتصادية وبوكيه الورد كان سهل لانها صحبتي WEEDING PLANNER وقولتلها عايزة ورد بسيط وشيك وميكنش حاجة كتيرة وضخم..UNIQUE
الحكاية من التجهيزات ان لازم تكوني مقتنع بالي نفسك فيه وبتختاريها خاليكي اقتصادية ولفي كتير واتفرجي على كل الموديلات و القصات ولو بتعرفي تعملي حاجة او اكسسورات بأيديك اعمليهم

الجواز مشاركه وحب وتفاهم اختاري الي يقدرك و يصونك ويحافظ عليكي و يكون عندك ويشوفك احلى زوجة و حبيبة في الدنيا .
مترضيش بأنك تكوني علي الهامش في حياته بل الكل ومتستعجليش في اختيارك و مترضيش بواحد بيستهان و بيقلل منك انتي ملكة ومتتخليش عن شغلك وحياتك واتجوزي الي يقدمك لقدام ويكبرك.
الجواز حلو بس اختاري صح

——————-/////—————

قصة جديدة وحكاية جديدة النهاردة معانا هبة والسيد مليجي حنحكي لكم قصتهم 

النهاردة معايا العروسةهبة والسيد مليجي بيحكوا لنا قصة فرحهم انا ارتبطت بالسيد وهو إنسان طيب جدا بس بقي القصة في فرحنا انا حلمت اني اعمل فرح وكانت ظروفنا مختلفة شوية مكتوب كتابي ولم يتم زفافي وكنت قلقة اني لايقبلوني بسبب ذلك لكن شاءت الظروف يكون في مسابقة في قناة العاصمة قدمتها الاستاذة ميار الببلاوي فقدمت فيها انا وبنوتات كتير وأصبحنا بعد كدة صديقات وأخوات اتعلمنا فيها حاجات مفيدة بس المسابقة فازت فيها واحدة بالعفش وانا بقي حظي الحلو فزت بحفلة الزفاف وهدايا كتير بس اتعملي فرح ولا فرح اليدي ديانا كل مصر اتكلمت عنه وكانت مامي ناهد هي مصدر ساعدتي لانها هي اللي وعدتني ان حتكوني احلي عروسة والدنيا كلها حتشارك فرحتك وبجد حققتلي كل دة أتعمل لي فرحي في هلنان لاند مارك في اكبر قاعة فيه ولبست اجمل فستان زفاف من ايد احلي مصممة فساتين الزفاف سماح مهران واتعملتلي احلي تورتة من ايد الاستاذة احسان وكانت الميكب ارتيست الجميلة شيماء هي عملتلي احلي ميكب وجاتلي بقي احلي زفة من احلي واحد محمد حشيش وعرفت بعد كدة انه هو كمان اللي كان عامل زفة مامي ناهد صاحبة الباب دة وكمان بقي جالي مطربين ومطربات روعة منهم ستونة وعملتلي احلي شو وكمان اتصورت اجمل صور بقي كانت بأيد المصور طه محمد وشاركني فريق عمل Groom & Brideاليوم دة بكل حاجة جميلة حقيقي اتعملي فرح ولا بالأحلام يابنات و رحت بقي قضيت اجمل شهر عسل في شرم الشيخ وعملولي احلي اربع ايام وكان البروجرام رهيب وانبسطت جدا صحيح انا اتجوزت بحاجات علي فكرة كتير ناقصة لان المسابقة ماكنتش فاكرة حفوز لكن بعد الزفاف كملتهاوجميل جدا انك تكملي بيتك واحدة واحدة وشفتي بقت اجمل شقة وربنا يفرحكم زي ماهو انا فرحت وانبسطت ونفسي اقول لكم اللي يصبر ينول ورضي الأب والام دة مصدر سعادة الكل بجد اكيد كل الجمال دة كان بدعي امي وابي

———/////——-////——-////—-

قصة فرح جديدة مع مامي ناهد والنهاردة مع عروستنا نور وعريسها احمد وعشقها للبس الفستان والطرحة وفرح كل عام

باب حكاية فرحي انا نور وجوزى احمد اتعرفنا على بعض فى مطعم صدفة جمعتنى بية وسط مجموعة من الاصدقاء المشتركين بدأت علاقتنا بخناقة وما حب الا بعد عداوة و من هنا بدا التعارف بينا بعدها بكام شهر كان متقدملى والدنيا كلها كانت واقفه بنا وبيحاولوا يفرقونا قررنا نتجوز بسرعه وعملنا كل حاجه بأيدينا حتي توضيب وفرش الشقه كنت انا وهو وبس و اتجوزنا يوم الفرح دة كان احلى يوم فى حياتي طبعا وزي كل بنت برغم حبي لاحمد كنت متوترة جدا بس قررت ارتب كل تفصيلة فية بنفسي وبدقة جامدة و كنت مستنية اشوف نتيجة مجهودى هيكون اية شكل القاعة و فستانى و بروجرام اليوم اكسسوارت المنسبة من كل النواحى و حاجات تانية كتير ابتدى يومى بالكوافير الى كان من احرص الحاجات الى دورت عليها عشان اهم شئ وهو ميكب العروسة الى الحمد لله اتوفقت ولقيتو ساعتها و فعلا كان الميكب تحفة وكان اول مرة فى حياتى ابقى راضية عن شكل الميكب بتاعى لدرجة ان الكوافير دة هو لحد دلوقتى كوافيرى الشخصى وبقيت كمان اعز اصحابي و من بعدو الفتوغرافر لان صور الفرح متتعوضش ولاني اصلا كنت مصوره فكان دة همى التانى وبرغم وجود كل أصدقائي المصورين كنت مركزه في النظر لمصور واحد اختارته بدقه واتصورت في اكتر من استديو وعملت سيشن تصوير في كل مكان في بلدي بعد كدة روحنا للقاعة و ابتديت الحفلة كان كله رائع وكنت اول واحده في عيلتنا تلبس كوتشي في فرحها كان اليوم جميل جدا و كل حاجة زى متخيلتها بظبط و قضيت احلى تجربة فى حياتى وبشهادة كل الي حضر كان اجن فرح اتعمل و بعد كدة روحنا البيت و كنا مجهزين عشان نسافر لاننا كنا مجهزين لشهر عسل فى دهب فى فندق بمنطقة البول هول و دة كان الجزء الى فية المتعة و السعادة بجد 5 ايام من السعادة و زيارة اماكن جميلة جدا و ساحرة بمنطقة دهب مدينة السحر والجمال من رحلة بحرية لسفارى في واحة وادي جني و الشواطئ ساحرة الجمال والغطس في البلوهول والثري بولز والقاعدة البدوية في جزيرة البلولجونا وأبو حلوم وأجمل سهره في الممشي السياحي و سهره الدي جي في جبل الطويلات من احلى التجارب فى حياتى كانت الرحلة دى الى بجد انصح اى عروسة بيها ومن كتر فرحتي بالتجربة قررت اعمل فرح كل سنة وفعلا عملتها تاني السنة دي و بكدة حكاية فرحى تكون خلصت يا رب تكونو استفدتوا

حكاية فرحي

حكاية اول عروسة نبدأ بها لقائنا في باب حكاية فرحي انا منة وجوزى منصور اتعرفنا على بعض فى الجامعة صدفة جمعتنى بية فى لجنة امتحان واحدة و من هنا بدا التعارف بينا بعدها بسنة كان متقدملى و بعدها ب 3 سنين اتجوزنا يوم الفرح دة كان احلى يوم فى حياتى اينعم كنت متوترة اوى بس كان بالنسبة لي يوم ملوش مثيل لانى كنت مرتبة كل تفصيلة فية و كنت مستنية اشوف نتيجة مجهودى هيكون اية شكل القاعة و فستانى و بروجرام اليوم اكسسوارت المنسبة من كل النواحى و حاجات تانية كتير ابتدى يومى بالكوافير الى كان من احرص الحاجات الى دورت عليها عشان اهم شئ وهو ميكب العروسة الى الحمد لله اتوفقت ولقيتو ساعتها و فعلا كان الميكب تحفة وكان اول مرة فى حياتى ابقى راضية عن شكل الميكب بتاعى لدرجة ان الكوافير دة هو لحد دلوقتى كوافيرى الشخصى اصل نسيت اقولكم ان من حسن حظى انو فى نفس منطقة سكنى و من بعدو الفتوغرافر لان صور الفرح متتعوضش فكان دة همى التانى و لحظاتي الحلو مرة تانية كان المكان بردو فى منطقة سكنى و يعتبر جمب الكوافير فكان سهل جدا المشوار ليهم هما الاتنين و فعلا بعد كدة روحنا للقاعة و ابتديت الحفلة كان كله رائع بس الحاجة الوحيدةً الى كانت تعبانى هى الشوز كان كعب عالى و اضطريت انى اقلعها مع اول 10 دقايق من الفرح و قضيت الحفلة كلها من غيرو غير كدة كان اليوم جميل جدا و كل حاجة زى متخيلتها بظبط و قضيت احلى تجربة فى حياتى و بعد كدة روحنا البيت و كنا مجهزين عشان نسافر لاننا كنا مجهزين لشهر عسل فى شرم الشيخ فى فندق بمنطقة سوهو سكوير و دة كان الجزء الى فية المتعة و السعادة بجد 5 ايام من السعادة و زيارة اماكن جميلة جدا و ساحرة بمنطقة شرم الشيخ الجميلة من رحلة بحرية لسفارى لسهل حشيش و الشواطئ ساحرة الجمال من احلى التجارب فى حياتى كانت الرحلة دى الى بجد انصح اى عروسة بيه و بكدة حكاية فرحى تكون خلصت يا رب تكونو استفدتوا

مامي ناهد حتشاركم كل خميس في “حكاية فرحي “و طبعا يوم الفرح بتبقي احلي ذكري في حياة اى عروسة عشان كدة هنبدأ ب “حكاية فرحي”
“”هنتعرف فيه عن قصة ارتباطك واستعدادك و تجهزيك للفرح حتي الصعوبات اللي واجهتك وايه النصيحة اللي تقدميها (انتي وعريسك) لعرسان المستقبل و ايه الحاجات اللي ممكن يستغنوا عنها..

ولو حاجزين شهر العسل ليه اخترتم المكان ده بالذات
و كمان تحكولنا عن شعور كل فرد في اسرتكم اليوم ده
وياريت تبعتولنا صوركم من بداية اليوم لحد ما تلبسي الفستان الابيض و لو حابة تبعتي لنا فيديو مجمع لفرحكم ماتترديش وابعتيه مع حكاية فرحك 

انتظروني كل خميس مع باب حكاية فرحي
ناهد حسين